އާބާދީ އާއި ތައްޤީ އެއްފަސްކުރުމުގެ ސިޔާސަތުގެ ދަށުން މީހުންދިރިއުޅޭ ރަށްރަށް ހުސްކުރުމަށްފަހު ރިޒޯޓުގެ ގޮތުގައި ތަރައްޤީކުރުމަށް 3ރަށެއް މާދަމާ ބީލަމަށް ހުޅުވާލައްވާނެއެވެ.

ޓޫރިޒަމް މިނިސްޓްރީން މަޢުލޫމާތު ދެއްވި ގޮތުގައި މި ޕްރޮގްރާމްގެ ދަށުން މާދަމާ ބީލަމަށް ހުޅުވާލާ ތިން ރަށަކީ، ރ.އެތްތިގިލި، ބ.ވައްކަރު، އަދި ގއ.ފަޅުމާފުއްޓެވެ. މިއިން ކޮންމެ ރަށެއްގައި ތަރައްޤީ ކުރުމަށް ކަނޑައެޅިފައިވަނީ، 200އެނދުގެ ރިޒޯޓެކެވެ.

މިތަންތަނަށް މީލަންފޮތް ވިއްކުމަށް ހަމަޖެހިފައިވަނި، މާދަމާއިން ފެށިގެން މިމަހު 27ހުގެ ނިޔަލަށެވެ. ބީލަން ފޮތުގެ އަގަގީ، ދިވެހިންނަށް ނުވަތަ 100 އިންސައްތަ ދިވެހި ހިއްސާވާ ކުންފުނި ތަކަށް 2000 ރުފިޔާއެވެ. އަދި ބިދޭސީ ފަރާތްތަކަށް ނުވަތަ ބިދޭސީން ހިއްސާވާ ކުންފުނިތަކަށް 300 އެމެރިކާޑޮލަރެވެ.

ބީލަމާބެހޭގޮތުން މަޢުލޫމާތު ދިނުމަށް ބޭއްވޭ ޕްރީބިޑް މީޓިންގ އޮންނާނީ، މިމަހުގެ 19ވަނަ ދުވަހުކަމަށާއި، ބައްދަލުވުން ބޭއްވޭނެ ގަޑިއެއް ފަހުން އިޢްލާން ކުރެވޭނެކަމަށްވެސް ޓޫރިޒަމުން މަޢުލޫމާތު ދެއްވައެވެ.

ބީލަން ހުށަހަޅާންޖެހޭ ސުންގަޑިއަކީވެސް އަދި ބީލަން ހުޅުވާ ތާރީޚާކީވެސް މިމަހުގެ 28 ކަމަށާއި، ބީލަން ހުޅުވާއިރު ބިޑް ސެކިއުރިޓީގެ ގޮތުގައި ދެލައްކަ އެމެރިކާޑޮލަރު ބޭންކް ގެރެންޓީއެއް ހުށަހަޅަންޖެހޭނެ ކަމަށްވެސް ތޫރިޒަމް މިނިސްޓްރީން މަޢުލޫމާތު ދެއްވައެވެ.