| މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ ފަރާތުން އެންމެ ފުރަތަމަ ތަރައްގީކުރި އައްޑު އަތޮޅު ހެރެތެރެ ރިސޯޓަށް މިއަދު ގެނައުމަށް ހަމަޖެއްސި 195 ފަތުރުވެރިން ހެރެތެރެއަށް ނުގެންގޮސް ރާއްޖޭގެ އެހެން ރިސޯޓުތަކަކަށް ބަދަލުކުރުމުގެ މަސައްކަތް ފަށައިފިއެވެ.
ރާއްޖޭގެ ހުރި އެހެން ރިސޯޓުތަކާ އެއްފެންވަރަށް ހެރެތެރެ ރިސޯޓުގެ ބައެއް މަސައްކަތްތައް ނުނިމިވާތީ ހެރެތެރެއަށް ގެނައި ފަތުރުވެރިން ރާއްޖޭގެ އެހެން ރިސޯޓުތަކަކަށް ބަދަލުކުރީ މިކަމުގެ ސަބަބުން ފަތުރުވެރިންގެ ކުރިމަތީގައި ރާއްޖޭގެ “އިމޭޖު ރީތިކުރުމު”ގެ ގޮތުން ކަމަށް ޓޫރިޒަމް މިނިސްޓްރީން މައުލޫމާތުދެއެވެ.
“އެއްގޮތަކުން މިއީ އަޅުގަނޑުމެން އުއްމީދުކޮށްގެން ތިބި ދުވަހެއް ނޫން... ހެރެތެރެ އެއްކޮށް ނުނިމި އޮތީމަ އެ ޒިޔާރަތްކުރި ފަތުރުވެރިންނަށް މިވަގުތަށް އެންމެ ރަނގަޅުވާނީ ރަނގަޅު ރިސޯޓަކަށް ދިޔުން ކަމުގައިވާތީ ރޭގަ ތޯމަސް ކުކާއި އަދި ޓޫރިޒަމް އިންޑަސްޓްރީގެ ނިންމި ވަރަށް ރަނގަޅު ނިންމެވުމެއް” ޓޫރިޒަމް ޕްރޮމޯޝަން ބޯޑުގެ މާކެޓިންގ އެކްޒިކެޓިވް މުހައްމަދު މަލީހު ވިދާޅުވިއެވެ.
މަލީހު ވިދާޅޫވީ ހެރެތެރެއަށް ގެނައި ފަތުރުވެރިން ބަދަލުކުރީ ރ.މީދުއްޕަރު ރިސޯޓަށާއި ހއ. އަލިދޫ ރިސޯޓަށާއި އއ. އެއްލައިދޫ ރިސޯޓަށް ކަމަށެވެ. ނަމަވެސް މިއަދު މެންދުރުފަހު މިފަތުރުވެރިން ކުރެން 30 އަށް ވުރެ ގިނަ ފަތުރުވެރިން މާލޭ ނަލަހިޔާ ހޮޓަލު ރިސެޕްޝަންގައި ތިއްބާ ފެނިފައިވެއެވެ. މިމީހުންނާ ބެހޭ އިތުރު މައުލޫމާތު ނޫސް ޗާޕަށް ދިޔައިރު ހޯދިފައެއް ނުވެއެވެ.
ރާއްޖޭގެ ޓޫރިޒަމް ދާއިރާގެ އެންމެ ފުންނާބުއުސް ބޭފުޅުން ތައްޔާރުކުރި ހެރެތެރެ ރިސޯޓަށް ފަތުވެރިން މިއަދު ނުފައިބާ ގޮތަށް ނިންމީ ހެރެތެރޭގެ ލޭންޑްސްކޭޕިންނާއި މަގުތަކާއެއްޗެހި ރާއްޖެ އަންނަ ފަތުރުވެރިންގެ “އެސްޕެކްޓޭޝަނަށް މެޗު”ނުވާތީ ކަމަށްވެސް މުހައްމަދު މަލީހު ވިދާޅުވިއެވެ.
އޭނާ ވިދާޅުވީ މިއަދު ހެދުނު 7:45 ގައި ގަމުގެ އެއަރޕޯޓަށް ޖައްސަން އޮތް ފުލައިޓު ކެންސަލުކުރިކަން އެގުނީ ރޭ ދަންވަރުގެ ވަގުތެއްގައި ކަމަށެވެ. އަދި މިފުލައިޓު އަނބުރާ ޖެއްސީ މާލޭ އިންޓަނޭޝަނަލް އެއާޕޯޓަށް ކަމަށާއި މިކަމުގެ ސަބަބުން ޓޫރިޒަމް އިންޑަސްޓްރީއަށް މާބޮޑު ގެއްލުމެއް ނުލިބޭނެ ކަމަށްވެސް އޭނާ ވިދާޅުވިއެވެ.
“އޭގެ ސަބަބަކީ އެކޮޅުން އައި ފަތުރުވެރިންނަކީ ފުދޭވަރެއްގެ ޑިސްކައުންޓެއް ލިބިގެން މިއައީ” މަލީހު ވިދާޅުވިއެވެ.
އެމްޓީޑީސީގެ ޗެއާމަން ހުސެއިން އަފީފު ވިދާޅުވީ ރާއްޖެއަށް ފަތުރުވެރިން ގެންނަ ފަރާތެއް ކަމުގައިވާ ތޯމަސް ކުކްގެ ފަރާތުން ހެރެތެރެ ރިސޯޓަށް ގެނައި ފަތުރުވެރިން އެރިސޯޓަށް ނުގެންދާ ގޮތަށް ނިންމީ ރަށުގެ ސާފުތާހިރުކަން ކުޑަކަމުން ކަމަށެވެ.
“އަޅުގަނޑުމެން މިގެނައީ އެއްއަހަރުދުވަސް ކުރިން އެއްބަސްވެފަ އޮތް ދުވަހަކަށް ގެނައުމަށް، މަސައްކަތަށް ބަލާއިރު ކޮޓެރިޔާ އެއްޗެހި ހުރީ ނިމިފަ އެހެންނަމަވެސް ކޮންސްޓްރަކްޝަން ނިމިގެން ހުރި ސިމެންތި ގޯނިތަކާއި މިހެންހުރި އެއްޗެހި މުޅި ރަށަކުން ނުނެގޭ. އެހެންނަމަވެސް އެމީހުން މުޅި ރަށުގަ ހިގާނެތާ އެހެންވެގެން” އަފީފު ވިދާޅުވިއެވެ.
އޭނާ ވިދާޅުވީ ތޯމަސް ކުކްގެ ފަރާތުން ފަތުރުވެރިން ގެނައީ ބޮޑަށް އިނގިރޭސި ވިލާތުންނާއި ޖަރުމަނުން ކަމަށެވެ. އަދި ފަތުރުވެރިން ރިސޯޓަށް ނުގެންދާ ގޮތައް ނިންމީވެސް ތޫމަސް ކުކްގެ ފަރާތުން ކަމަށް ވިދާޅުވިއެވެ.
ހަސަން އަފީދު އިތުރަށް ވިދާޅުވީ 4.5 ކިލޯމީޓަރުގެ ދިގު ހެރެތެރެ އެއްކޮށް ސާފުކޮށް ނިމެނޭނެ ކަމަށް މިހާރު އަންދާޒާ ކުރެވެނީ ތިން ހަފްތާތެރޭގައި ކަމަށެވެ.
“މިއީ ވަރަށް ގާމަތި ރަށެއް، ވަރަށް ގިނަ ތަންތަނުގައި އަކިރިޔާއި ގާ އޮތީ، އެހެންވީމަ އެތަންތަނަށް ދޮންވެލި އަޅައި ރީތިކުރުން އެއީ މުހިންމު ކަމެއް” ހަސަން އަފީފު ވިދާޅުވިއެވެ.
| 
0 Responses to “ހެރެތެރެއަށް ގެނައި ފުރަތަމަ 195 ފަތުރުވެރިން މަގުމަތިއަޅައިފި”
Posting Komentar